Захиргааны Журмаар Албадан Хөдөлмөр Хийлгэх Тухай

Энэ хуулийн зорилт нь захиргааны журмаар баривчлагдсан этгээд зардлаа төлөх чадваргүй, эсхүл төлөхөөс зайлсхийлсэн тохиолдолд түүнийг албадан хөдөлмөрлүүлж, баривчлагдсан хугацааны үйлчилгээний зардлыг нөхөн төлүүлэх журмыг тогтоож хэрэгжүүлэхтэй холбогдсон харилцааг зохицуулахад оршино.

Захиргааны журмаар албадан хөдөлмөр хийлгэх тухай хууль тогтоомж нь Захиргааны хариуцлагын тухай¹, Шүүхийн шийдвэр гүйцэтгэх тухай, энэ хууль болон тэдгээртэй нийцүүлэн гаргасан хууль, тогтоомжийн бусад актаас бүрдэнэ.

Захиргааны журмаар баривчлагдсан этгээд баривчлах байранд байсан хугацааны зардлаа төлөх чадваргүй, эсхүл төлөхөөс зайлсхийсэн тохиолдолд шүүхийн шийдвэр гүйцэтгэх байгууллага тухайн этгээдээр албадан хөдөлмөр хийлгэнэ.

Захиргааны журмаар албадан хөдөлмөр хийлгэхдээ зөвхөн шүүхийн шийдвэрийг үндэслэл болгож баривчлагдсан этгээдийн эрүүл мэнд, хөдөлмөрийн чадварыг харгалзана.

Захиргааны журмаар баривчлагдсан этгээдээр албадан хөдөлмөр хийлгэх тухай шийдвэрийг шүүх гаргана.

Захиргааны журмаар баривчлагдсан этгээдээр албадан хөдөлмөр хийлгэх хугацаа нь баривчлах шийтгэлийн хугацаанаас илүүгүй байна.

Аймаг, нийслэлийн Засаг дарга албадан хөдөлмөрлүүлэхээр шийдвэр нь гарсан, баривчлагдсан этгээдийг ажлын байраар хангана.

Албадан хөдөлмөрийг хууль тогтоомжид заасан хөдөлмөрийн аюулгүй ажиллагаа, эрүүл ахуйн шаардлага хангасан нөхцөлд байнгын харуул хамгаалалт дор зохион байгуулна.

Албадан хөдөлмөрийн ажлын норм, үнэлгээг тухайн ажилд хамаарах нийтлэг норм, үнэлгээг баримтлан тогтооно.

Албадан хөдөлмөрлөсөн этгээдийн цалин хөлснөөс баривчлах байранд байсан хугацаанд гаргасан зардлыг /байр, хоол, бусад үйлчилгээ/ суутгаж үлдсэн хэсгийг нь өөрт нь олгоно.

Баривчлагдсан этгээдийн цалин хөлс нь баривчлах байрны зардлыг төлөхөд хүрэлцэхгүй тохиолдолд шүүхийн шийдвэр биелүүлэх журмаар гаргуулж болно.

Баривчлагдсан этгээд албадан хөдөлмөр хийхээс зайлсхийсэн буюу оргосон хугацааг түүний баривчлагдсан хугацаанд оруулж тооцохгүй.

Баривчлагдсан этгээд албадан хөдөлмөр хийлгэхтэй холбогдуулан шүүхэд гомдол гаргаж болно.

Энэ хуулийг 2000 оны 4 дүгээр сарын 1-ний өдрөөс эхлэн дагаж мөрдөнө.